L VIDEO GËURA I UEDLI

L’idea dla sëira video ie stata scialdi tucheda y à plajù. N mierculdi, ai 21 de dezëmber se an ancuntà tl tennis curì te Sëlva per fé na videoanalisa dl colp de "dritto" y chëi che fova leprò à dessegur pudù prufité di cunsëies che ëi à pona daldò giapà da nosc maester espert y scialdi cumpetënt Stefano. Prufesciunela fova nce la maniera de tò su dut cant, de chësc se à cruzià nosc cumëmber Giuliano, ël à nce dit la sia ntan la videoanalisa desmustran nstëss de vester scialdi anjinià sun l’argumënt. Dut ntëur ti al plajù a duc canc, dantaldut pudëi udëi la deferënzia danter "nëus jugadëures amatëures" y nosc cumpani Patrick Prader che à mustrà "coche n tuchëssa da fé". Ma mpo se à uniun udù ora velch de positif te si juech y se tulerà dessegur a cuer i cunsëies de Stefano, ajache ulon pu deventé miëures. Proscimamënter se ancuntons mo plu suvënz per lauré inant.

De gra a Stefano y Giuliano!

SUZES PRA I CURSC DA D’AUTONN PER I MËNDRI

Sciche uni ann à l T.C. S. Cristina/Sëlva metù a jì n curs per mutons i mutans che scumëncia a fé tennis. Danter chisc nen iel nce scialdi de pitli, de tei che va ala scolina. Sambën che l lëur cun chisc ie scialdi mpeniatif, ma tl medem mumënt dal nce de bela sudesfazions per i atlec nstësc sciche nce per i maestri. Y cialé pro ie propi n devertimënt.

Ti mbincion a duc chisc pitli che ëi posse giapé pea nce la gran pascion per chësc bel sport.

I alenamËnc va inant a var plËn

Chël de nosta lia ie urmei n scuadron de atlec che à debujën de se ancunté for plu suvënz per se alené. Daujin ala preparazion tecnica iel da fé nce mpue de atletica, d’uni sort de esercizies de cuordinazion, de sveltëza, de forza y nsci inant. Perchël iel daujin ai maestri Stefano y Patrick nce doi personajes scialdi mpurtanc per nosta atività: Giampaolo y Carlo! Nce sce ëi vën me a nes cri n iede al mëns ie si cunsëies y si manieres de nsenië fundamenteles per pudëi arjonjer resultac mo miëures tl daunì. De gra!